Twitter միկրոբլոգային սոցկայքը փակել է Սոմալիի Ալ-Շաբաբ խմբավորման անգլալեզու էջն իր տիրույթում, հայտնում է Courier Mail-ը:     Ալ-Կաիդայի հետ կապեր ունեցող ապստամբների խմբավորման էջը փակվել է, երբ այնտեղ հրապարակվել են սպանված ֆրանսիացի զինվորի լուսանկարները: Միևնույն ժամանակ շարունակում է գործել խմբավորման արաբալեզու էջը: Ի դեպ, հենց դրա միջոցով Ալ-Շաբաբը հայտնել է, որ Twitter-ը գրաքննություն է իրականացրել իր դեմ՝ դա որակելով «Արևմուտքում խոսքի ազատության նոր ապացույց»: Ավելի վաղ ֆրանսիացի զինվորականի լուսանկարների տարածումը քննադատել էր Ֆրանսիայի վարչապետ Ժան-Մարկ Էյրոն: