Ուղիղ 20 տարի առաջ աշխարհում առաջին անգամ կարճ տեքստային հաղորդագրություն` SMS, ուղարկվեց: SMS-ի ծննդան օրվա կապակցությամբ գաղափարի հեղինակ Նիլ Պապուորտը պատմել է ուղարկված առաջին հաղորդագրության մասին, որը մեկընդմիշտ փոխել է  բջջային կապի ոլորտը: Բրիտանացի ինժեները մինչ այսօր չի կարողանում հավատալ, որ կապի՝ իր կողմից առաջարկված տարբերակը բջջային սովորական զանգերի համար լուրջ մրցակից դարձավ: Նիլ Պապուորտը հիշել է առաջին SMS-ի բովանդակությունը` ընդամենը երկու բառը «Շնորհավոր Սուրբ Ծնունդ»: Sky News-ի հաղորդմամբ` 2011թ-ին Բրիտանիայում 150 միլիարդ SMS է ուղարկվել: Ուսումնասիրությունները ցույց են տվել, որ ամենից հաճախ այս ծառայությունից օգտվում են 12-15 տարեկան դեռահասները. նրանք շաբաթական միջինը 193 SMS են ուղարկում: