Հրապարակվել է ամենահուսալի և հարմար բջջային բրաուզերների ցուցակը, որը հիմնված է օգտատերերի կարծիքի վրա: Հաղթել է Apple-ի Safari բրաուզերը: Ցուցակում վերջին տեղում է հայտնվել Internet Explorer-ը` Windows Phone-ի համար: Այս մասին գրում է The Next Web-ը:  Հարցման արդյունքում պարզ է դարձել, որ օգտատերերն ամենից քիչ խնդիրներ են ունեցել Safari բրաուզերի հետ կապված, և այն հավաքել է 1.31 միավոր: Safari-ից հիմնականում բողոքել են Flash-ի աջակցության բացակայության, ինչպես նաև կոնտենտի ամբողջությամբ արտացոլման համար փոքր տարածության պատճառով:  Android-ի ստանդարտ բրաուզերը 0.87 միավոր է հավաքել: Դրանից հիմնականում բողոքել են հավելվածից անսպասելիորեն դուրս գալու պատճառով:  Opera-ն 0.7 միավոր է հավաքել: Դրա հիմնական խնդիրն այն է, որ ինտերֆեյսի տարրերը էկրանին մեծ տեղ են զբաղեցնում:  Chrome-ի բջջային բրաուզերը 0.64 միավոր է հավաքել: Այս բրաուզերն էլ չի կարողանում ճիշտ աշխատել տառատեսակների հետ:  Internet Explorer-ը 0.28 միավոր է հավաքել: Այն հիմնականում չի կարողանում ճիշտ արտացոլել էջերը: