Նոր Զելանդիայում Վիկտորիայի համալսարանի հոգեբանները եկել են եզրահանգման, որ մարդիկ վախենում են երջանիկ լինել, քանի որ վախենում են, թե այդ պատճառով նրանց հետ ինչ-որ վատ բան տեղի կունենա: Այս մասին գրում է The Telegraph­-ը:  Գիտնականները պարզել են, որ ինչպես արևմտյան, այնպես էլ արևելյան մշակույթի շատ կրողներ անգիտակցաբար հրաժարվում են երջանկությունից, քանի որ, նրանց կարծիքով, դա նրանց կդարձնի էգոիստական, ձանձրալի, մակերեսային, ընդհանուր առմամբ` ավելի վատը:  Որոշ արևելյան երկրներում մարդիկ նույնիսկ համարում են, սեփական անձին երջանիկ համարելը նշանակում է   "աչքով տալ” և դրանով գերբնական ուժերի զայրույթն առաջացնել, ինչին կարող են մեծ անհաջողություններ հետևել: Միաժամանակ գիտնականները նշում են, որ սեփական ճակատագրից գոհ լինելն առավելապես հատուկ է արևմտյան մշակույթի ներկայացուցիչներին:  Սակայն մշակութային առանձնահատկություններից զատ, երջանիկ լինելու հանգամանքը կախված է նաև մարդու անձնային առանձնահատկություններից, որը պայմանավորված է գեներով: Մարդիկ, ովքեր երջանկության "հակվածության” գեն են ժառանգել իրենց նախնիներից, որոշակի էմոցիոնալ պաշար են կրում, որը նրանք կարող են սպառել դժբախտության պահին և որն արագացնում է մարդու հոգեբանական վերականգնումը: Ընդ որում, գիտնականները հավաստում են, որ երջանիկ մարդիկ ավելի երկար են ապրում: Լավ տրամադրությունը նվազեցնում է սթրեսի հորմոնի մակարդակն արյան մեջ, ամրապնդում դիմադրողականությունը և կարգավորում սրտի աշխատանքը: