1. 2014թ. երկար դեգերումներից Հայաստանը կհայտնվի նոր ձևավորված «ՄԱՔՍ»-իմուս»» համաստեղության «բարերար» ազդեցության ներքո, որի արդյունքում «ԱՍՈՑԱՑԻԿՈՒՍ» համաստեղության կողմից հովանավորվողները կկանգնեն իրենց ինքնության արդիականացման խնդրի առջև: 

2. «ՄԱՔՍ»-իմուս»» համաստեղության հովանու ներքո գտնվելու շնորհիվ՝ հայերը կամ արմենոսները կունենան առաքյալի սիրտ, իմաստասերի գլուխ և բանասերի լեզու ունեցող Ազգային ժողով, անձնուրաց և սակավապետի կյանքով ապրող իշխանավորներ (ըստ արձանագրության՝ համայնքապետեր), հարստությունը ժողովրդին ժառանգած և ճգնավոր դարձած նախկին օլիգարխներ: 

3. Վիրտուալ հարթակում (մայաները նկատի ունեն ֆեյսբուքը) ինֆորմացիոն աղմուկին և վերբալ պատերազմին փոխարինման կգա քրիստոնեական սիրո վրա խարսխված հաճոյախոսությունների մշակույթը, որի շնորհիվ յուրաքանչյուր տարին կամփոփվի «Լավագույն ընդդիմասեր իշխանավոր» և «Լավագույն իշխանասեր ընդդիմադիր» անվանակարգերում հաղթողների անունների հրապարակմամբ: Խիզախությունը կդադարի լինել ֆեյսբուքյան կատեգորիա: Սոսկ ֆեյսբուքյան «գլադիատորներ» այլևս չեն լինի, առնականությունը ֆեյսբուքի տիրույթում այլևս չեն փնտրի: 

4. Տեղի կունենա արժեքների փոփոխություն: Այլևս նորաձև չեն համարվի արտագաղթ, բյուջեի դեֆիցիտ, ինֆլյացիա, գնաճ, ատկատ, տրանսֆերահույս ժողովուրդ, խոպան, կաշառակերություն կոչվող «արժեքները» և այլն:   5. Ցրտաշունչ ձմեռներից վախը կդառնա անցյալի իրողություն, քանի որ Հյուսիսից եկող տաք հոսանքները «կբարձրացնեն» գազի կալորիականությունը և «կիջեցնեն» սակագինը: Բացի այդ, աշխարհի քաղաքական քարտեզի շտկումից հետո Հայաստանը կօգտվի գազի ու նավքի սեփական պաշարներից:  

6. Դիպլոմասիրությունը կփոխարինվի գիտելիքասիրությամբ, դրամասիրությունը՝ պատվասիրությամբ, իշխանասիրությունը՝ ժողովրդասիրությամբ, վերբալիզմը՝ աշխատասիրությամբ: Իշխանության համար պայքարը կընթանա ոչ թե սոսկ ձայնալարերով, այլ՝ աստվածատուր բանականության օգնությամբ:  

Հ.Գ. Հուսանք, որ 2014 թ. նշված կետերից որոշները կյանքի կոչելու կամքը կձևավորենք, քանզի կարևորը ոչ միայն և գուցե թե ոչ այնքան արդյունքն է, որքան արդյունքին հասնելու կամքն ու վճռականությունը: