Մի՞թե դուք դեռ չգիտեք HRAG-ին կամ հիփ-հոփ երաժշտաոճում հանդես եկող 18-ամյա Հրագ Սիմոնյանին, ով «էկել ա նոր խոսք ասելու» հայկական շոու-բիզնեսում: Երիտասարդ կատարողը, ով վերջին շրջանում բավականին լայն ճանաչում է ստացել հատկապես երիտասարդների ու պատանիների շրջանում, այսօր «Էս նոր ա» խորագրով փոքրիկ մենահամերգ ունեցավ «iBar Club»-ում, որի ժամանակ հանդիսատեսին ներկայացավ իր երգացանկի շուրջ 14 կատարումներով:
Հրագը ոչ միայն երգում էր, այլեւ բավականին ակտիվ շարժվում «բեմում», ինչը ոգեւորել էր անգամ 6-ամյա փոքրիկ ընկերոջը` Ներոյին, ով գրեթե ամեն երգի ժամանակ իր ակտիվ ու աշխույժ պարով ուրախացնում էր հանդիսատեսին, Հրագի ընկերներին ու բարեկամներին:
«Հրագը լավ երգիչ է: Շատ եմ սիրում նրա երգերը: Վստահ եմ` մի օր նա մեծ համերգներ կունենա, ես էլ կպարեմ այդ ժամանակ: Շատ եմ հավանում հիփ-հոփ ոճի պարը: Լա՞վ եմ պարում»,- ասաց 6-ամյա փոքրիկը` շարունակելով իր «ելույթով» գրավել հանդիսատեսին:
Փոքրիկ մենահամերգի ժամանակ Հրագը դուետով ելույթ ունեցավ նաեւ Էմմայի հետ` կատարելով «Fun Dance» ստեղծագործությունը: Բացի Էմմայից` Հրագի համերգին մասնակցում էր նաեւ երգչի ընկերը` Արտյոմ Հակոբյանը, ով նույնպես ելույթ ունեցավ «iBar Club»-ում մեկտեղված հանդիսատեսի համար:
«Հրագը շատ բարի տղա է: Վստահ եմ` դեռ իր խոսքը կասի մեր շոու-բիզնեսում: Մոտ ապագայում մեզ նոր անակնկալներ են սպասվելու: Հրագն իր տաղանդով ու աշխատասիրությամբ շատ բաների կհասնի»,- նշեց Արտյոմը:
Օրվա հերոսն էլ իր 14 կատարումներով ուրախ տրամադրություն հաղորդեց հանդիսատեսին, որի շարքերում հիմնականում երիտասարդներ էին: Հրագը նաեւ բավականին գեղեցիկ պար բեմադրեց իր ընկեր Դավիթի հետ:
«Երկար տարիներ պարել եմ, իսկ այժմ մեծ սիրով երգում եմ: Ոչ միայն մերօրյա խնդիրների, այլեւ երիտասարդներիս առօրյայի մասին են կատարումներս: Փորձելու եմ որոշակիորեն ակտիվացնել երիտասարդներին: Հենց դրան է նվիրված «Չհանձնվես» կատարումս»,- ասաց Հրագը` շարունակելով իր մենահամերգը:
1 Ադմինիստրատոր
1 Գլխավոր մոդերատոր 
տղամարդ: 1404 
կին: 883
