Միշտ էլ գեղեցիկ են համարվում գունեղ, արտահայտիչ, հյութեղ և թավշե շուրթերը: Այս ամենի համադրությունը ստանալն այնքան էլ հեշտ չէ, սակայն մեր բարձրակարգ մասնագետները քեզ կօգնեն:

Նախապատրաստումը

Շուրթերդ մաքրիր ատամի թաց խոզանակով (կամ շփիր շաքարի խորանարդիկով), որպեսզի թեփուկավոր հատվածները շերտազատվեն, այլապես շրթներկը կարող է հարթ չնստել:

Տեխնիկան

1. Բարակ շերտով մաքրող բալզամ քսիր և հինգ րոպե թող` ներծծվի: Անփայլ շրթներկերը հիմնականում փոշենման պիգմենտներից են պատրաստված: Եթե հիմնային խոնավացում չարվի, շուրթերը չորացած տեսք կունենան:

2. Շրթունքներիդ եզրերն ամբողջությամբ ընդգծիր շրթներկի գույնին համապատասխան մատիտով, հետո ներկիր միջին հատվածը. արդյունքում՝ շրթունքներդ կոկիկ տեսք կունենան:

3. Սովորական դիմափոշու մեջ թաթախված փոքրիկ վրձնով չորացրու շուրթերդ այնպես, որ մատիտի հետագիծը շեշտվի, իսկ փայլը` ներծծվի:

4. Այնուհետև քսիր անփայլ շրթներկը: Արագ ու կարճ վրձնահպումներով մեջտեղից դեպի յուրաքանչյուր շուրթիդ անկյունները ներկիր այնպես, որպեսզի շատ հաստ շերտ չստացվի:

5. Շրթունքի վրձնով հարթեցրու անկյունները և շրթներկը միահյուսիր մատիտի գծին: Հատուկ ուշադրություն դարձրու անկյուններին. սուր գիծն անբնական ու չափից դուրս արտահայտիչ է: