Facebook սոցցանցի աճը ի վերջո կարող է կանգնել, ինչպես վարակիչ հիվանդությունը, որն արագ տարածվում ու հանկարծակի կանգ է առնում: Այս մասին նշել են Պրինստոնի համալսարանի հետազոտողները, ովքեր սոցիալական ցանցի կյանքի շրջապտույտը ներկայացնելու համար  որպես մոդել օգտագործում են հիվանդությունների զարգացումը:  Հիվանդությունների մոդելներն օգտագործվել են մասսայական փոխառումն ու յուրացումը հասկանալու ու դրան հաջորդող պայքարը առցանց սոցիալական ցանցերի դեմ նկարագրելու համար, այս մասին հայտնել են Պրինստոնի մեխանիկայի ու օդային ճարտարագիտության բաժնի գիտնականները` հունվարի 17-ին հրապարակված հետազոտության մեջ: Հետազոտությունը դեռևս չի վերանայվել ու քննարկվել այլ գիտնականների կողմից: Հիվանդությունների տարածման ավանդական մոդելներն օգտագործելով՝ գիտնականները ենթադրել են, որ «ապաքինման» համար անհրաժեշտ է շփման մեջ մտնել չվարակված անդամների հետ (ինչպես այս դեպքում, Facebook չօգտագործող մարդու հետ շփումը) ու կանխատեսում են, որ Facebook-ի օգտատերերը շուտով կսկսեն դադարել կայքից օգտվելը, որի արդյունքում այն կկորցնի իր օգտատերերի 80%-ին, երբ հասնի իր ակտիվության գագաթնակետին՝ մոտավորապես 2015-2017թթ.: Facebook-ի օգտատերերը կկորցնեն իրենց հետաքրքրությունը Facebook-ի նկատմամբ, երբ նրանց ընկերները սկսեն կորցնել իրենց հետաքրքրությունը (եթե, իհարկե, գիտնականների կողմից արված այս հետազոտությունը համապատասխանում է իրականությանը): Հետազոտության մեջ նշվում է, որ գաղափարները հիվանդության վարակի նման տարածվում են մարդկանց մեջ, մինչև ի վերջո մեռնում են: Այդ երևույթը հաջողությամբ բացատրվել ու ներկայացվել է համաճարակաբանության մոդելներով: