Ապրիլի 27-29-ը Ծաղկաձորում կանցկացվի հաքաթոն, որի նպատակն է ստեղծել հայ հասարակության համար անհրաժեշտ ու հետաքրքիր ծրագրեր, որոնք աշխատում են Android օպերացիոն համակարգով, և Google Chrome դիտարկչի համար նախատեսված հետաքրքիր հավելումներ (extensions/apps), ինչպես նաև մեծացնել հետաքրքրությունը մոբիլ և ցանցային տեխնոլոգիական լուծումների հանդեպ:

Մասնակիցների կողմից ներկայացվող նախագծերի գրանցումը տևելու է մինչև ապրիլի 18-ը: Այնուհետև միջոցառման կազմակերպիչների կողմից կդիտարկվեն բոլոր գրանցված նախագծերը և կընտրվեն լավագույնները, որոնք հնարավորություն կունենան մասնակցելու երկօրյա հաքաթոնին: Ընտրված մասնակիցներն ապրիլի 20-ին կհրավիրվեն նախնական հանդիպման, որտեղ հարց ու պատասխանների միջոցով կկարողանան ստանալ իրենց հուզող հարցերի պատասխանները՝ հաքաթոնի վերաբերյալ:

Ընտրված մասնակիցները կկարողանան աշխատել իրենց նախագծերի վրա մինչև ապրիլի 27-ը:

Ապրիլի 27-ի երեկոյան թիմերը կուղևորվեն Ծաղկաձոր, որտեղ պետք է հաքաթոնի երկու օրերի ընթացքում շարունակեն աշխատել իրենց նախագծերի վրա, իսկ հաքաթոնի երկրորդ օրվա վերջում պետք է ներկայացնեն իրենց ծրագրերը՝ հնարավորինս պատրաստ վիճակում:

Միջոցառման ժյուրիի կազմում ընդգրկված կլինեն 6-8 անդամներ` «GTUG ՀԱՅԱՍՏԱՆ» խմբի համակարգողներ, «Vivacell –MTS» և «Mediamax» ընկերությունների աշխատակիցներ, արտասահմանից հրավիրված հյուրեր, ինչպես նաև հայկական ՏՏ ընկերություններից հրավիրված մասնագետներ: Գրանցվելու և այլ մանրամասների համար այցելեք այստեղ: