Չորս տարի առաջ՝ հունիսի 25-ին, սրտի աշխատանքի հանկարծակի դադարի հետևանքով կյանքի 50-րդ տարում մահացավ աշխարհահռչակ փոփ երգիչ Մայքլ Ջեքսոնը։ Մայքլ Ջոզեֆ Ջեքսոնը ծնվել է 1958 թվականի օգոստոսի 29-ին Ջո և Քեթրին Ջեքսոնների ընտանիքում. բազմազավակ ընտանիքի 9 երեխաներից 7-րդն էր: Արդեն 1 տարեկան հասակում տանը նկատում են Մայքլի հետաքրքրվածությունը երաժշտության հանդեպ: Ջեքսոնը երգել սկսել է փոքրուց: Բեմում հանդես է գալիս 1964 թ.-ից՝ «The Jackson 5» ընտանեկան խմբի կազմում։ 1971-ին նա համատեղ սկսում է իր սոլո կարիերան ու մի քանի տարվա մեջ հասնում լուրջ հաջողությունների: Շուտով նրան է վերագրվում «Փոփ արքա» կոչումը։ 1982-ին թողարկված նրա «Thriller» ալբոմը ցայսօր աշխարհում ամենաշատ վաճառված ալբոմն է: «Փոփ երաժշտության արքան» ռեկորդակիր է իր ստացած տիտղոսներով (արժանացել է «Սերնդի», «Տասնամյակի», «Դարի լավագույն երգիչ», «Հազարամյակի արտիստ» կոչումներին), մրցանակների, վաճառված ձայնասկավառակների քանակով (Ջեքսոնը բոլոր ժամանակների ամենաշատ սկավառակ վաճառած արտիստն է (շուրջ 780 միլիոն սկավառակ))։ Ջեքսոնը 13 անգամ գրանցվել է «Գինեսի» ռեկորդների գրքում։ Իսկ ընդամենը վերջերս «New Musical Express» ամսագրի 10 միլիոն ընթերցողները քվեարկել ու նրան են ընտրել որպես պատմության մեծագույն վոկալիստի։ Ջեքսոնի օգտին քվեարկել է 10 միլիոն մարդ՝ նրանց թվում Facebook սոցիալական ցանցի 4 հազար մեկնաբաններ։ Փոփ արքան 10 միավորից հավաքել է 9,02 միավոր: