Գոյություն ունեցող սոցիալական ցանցերի մեծ մասը հնարավորություն են տալիս օգտատերերին ոչ միայն շփվել միմիանց հետ, այլև  նվերներ նվիրել: Իհարկե դրանք վիրտուալ նվերներ են, ոչ իրական, բայց որոշ մարդկանց համար այդպիսի նվերն էլ հաճելի է, չէ որ դա էլ ուշադրության դրսեվորում է: Նվերներ կարելի է տալ օրինակ Օդնոկլասսնիկի և Վկանտակտե կայքերում: Առաջ վիրտուալ նվերներ հնարավոր էր նվիրել նաև Facebook-ում: Երկու տարի առաջ այդ ծառայությունը կասեցվել էր, բայց ստեղծողները չեն մոռացել նվերների մասին: Այժմ Facebook–ում կավելանա նոր ծառայություն, որը հնարավորություն կտա միմիանց նվիրել իրական նվերներ:


Ծառայությունը ստացել է առավել սպասված անունը "Facebook Gifts": Նվերները կարող են լինել բազմազան: Այս ծառայության ստեղծման համար սոցիալական ցանցը պայմանագիր է կնքել ավելի քան հարյուր գործընկերների հետ, որի արդյունքում նվերների ցանկում ավելացել են ինտերիերի պարագաներ, տեխնիկա, հագուստ և տարբեր տեսակի համեղ ուտեստներ: Կան նաև նվերային սերտիֆիկատներ (օրինակ Starbucks-ից): Նվերների ցանկում կան հարյուրավոր իրեր, որն էլ կտա ընտրության լայն հնարավորություն:


Հարկ է նշել, որ նվերի առաքման հասցեն ընտրում է ոչ թէ նվերը ուղարկողը, այլ ստացողը: Նվերը ուղարկողի կողմից ընտրվելուց հետո, նվերի մասին տեղեկանում է ստացողը` ստանալով հաղորդագրություն հեռախոսին, կամ սոցիալական կայքից: Բացի այս, ստացողը կարող է ընտրել նվիրվող իրի որոշ պարամետրեր, այդ թվում նաև գույնը, համային հատկանիշները և ուրիշ այլ տարրեր: Հաստատելուց հետո ստացողը պետք է մուտքագրի հասցեն, որտեղ էլ կառաքվի նվերը: Առաքումը կկատարվի մի քանի օրվա ընթացքում:


Նվերը գնելու համար հարկավոր կլինի նշել ձեր կրեդիտ քարտի տվյալները, որն էլ հետագայում կպահպանվի սոց-ցանցի սերվերներում: Այստեղ ոչ մի արտասովոր բան չկա, սակայն հավանաբար սա շատերին դուր չի գա:
Սկզբնական շրջանում նվերների ծառայությունը կգործի միայն ԱՄՆ-ի տարածքում: Սակայն շուտով հասանելի կլինի նաև այլ երկրների օգտատերերին: Այժմ ստեղծողները մշակում են հավելումներ Facebook-ի բջջային տարբերակի համար: